Saturday, 14 April 2012 09:01

မြန်မာ့သစ်တောပညာရှင် ဦးအုန်း

ဦးအုန်းကို စစ်ကိုင်းမြို့ မန်ကျည်းစင်တင်းတိတ်ရွာတွင် မြန်မာနှစ် ၁၂၈၉ ခု ဝါခေါင်လဆန်း ၁၀ ရက်နေ့က မွေးဖွားခဲ့သည်။ အဖ လယ်ရှင်၊ မြေရှင် ရွာသူကြီး ဦးဘသော် ဖြစ်ပြီး အမိ ဒေါ်နှင်းရီ ဖြစ်သည်။

သိမ်တော်ရွာ မူလတန်းကျောင်းနှင့် စစ်ကိုင်းမြို့ အစိုးရ အထက်တန်းကျောင်းတို့တွင် ပညာသင်ယူခဲ့သည်။ ၆ တန်း ကျောင်းသားဘဝတွင် မြန်မာနိုင်ငံကို ဂျပန်တို့ ဝင်လာသဖြင့် ၃ နှစ်ခန့် ပညာရေး လစ်ဟင်းခဲ့ရပြီး ၁၉၄၅ ခုနှစ်ရောက်မှ ကျောင်းပြန်တက်ခဲ့ရသည်။ ၁၉၄၆-၄၇ ခုနှစ် ၈ တန်းတွင် ပညာသင်ကြားနေစဉ် ၁၀ တန်း စာမေးပွဲ ဝင်ရောက်ဖြေဆိုရာ အောင်မြင်ခဲ့သည်။

၁၉၄၉ ခုနှစ် အင်တာ second year (ဒုတိယနှစ်) ဖြေအပြီးတွင် ပြည်တွင်းစစ်မီးကြောင့် မိဘများ စီးပွားဥစ္စာ ပျက်စီးဆုံးပါးသဖြင့် မန္တလေး ပိုက်ကျုံးရပ်ရှိ ကြီးတော်အိမ်တွင် နေထိုင်ကာ တက္ကသိုလ်မှ ဆရာကြီး ဦးနက် အထောက်အပံ့ဖြင့် ကျောင်းတက်ခဲ့ရသည်။ တတိယနှစ် ပညာသင်ယူနေစဉ် ဖခင်ဖြစ်သူ ဆုံးပါးခဲ့သည်။ ၁၉၅၁ ခုနှစ်တွင် ဘီအက်စ်စီဘွဲ့ ရရှိခဲ့သည်။ ဘွဲ့ရပြီးနောက် စစ်ကိုင်း အမှတ် (၁) အထက်တန်းကျောင်းတွင် ၁ နှစ်နှင့် ၄ လ ကျောင်းဆရာလုပ်ပြီး အစိုးရ ပညာတော်သင် လျှောက်ခဲ့သည်။

၁၉၅၂ မှ ၁၉၅၆ အထိ အင်္ဂလန်နိုင်ငံ မြောက်ဝေလ တက္ကသိုလ် (Wales University) ၌ သစ်တောပညာ ဘာသာရပ်ကို သင်ယူခဲ့ပြီး ၁၉၅၆ တွင် ဘီအက်စ်စီ (သစ်တော) ဂုဏ်ထူးဘွဲ့ ရရှိခဲ့သည်။ ၁၉၅၈ ခုနှစ်တွင် နိုင်ငံခြား ပညာတော်သင် သွားရာ၌ အစစကူညီခဲ့သူ သစ်တောမင်းကြီး ဦးနေဝင်း၏တူမ မခင်မြနဲ့ လက်ထပ်ခဲ့ပြီး သား ၂ ဦး၊ သမီး ၂ ဦး ထွန်းကားခဲ့သည်။

၁၉၅၇ မှ ၁၉၈၈ အထိ မြန်မာနိုင်ငံ သစ်တောဦးစီးဌာနတွင် သစ်တောဝန်ထောက်၊ သစ်တောညွှန်ကြားမှူး အဖြစ် တာဝန်အသီးသီး ထမ်းဆောင်ခဲ့သည်။ ၁၉၆၄ ခုနှစ်မှ ၁၉၇၃ ခုနှစ် အတွင်း ရန်ကုန် ဝိဇ္ဇာနှင့်သိပ္ပံတက္ကသိုလ် သစ်တောပညာဌာနတွင် တွဲဖက်ပါမောက္ခအဖြစ် တာဝန်ထမ်းဆောင်ခဲ့သည်။

၁၉၆၃ ခုနှစ်တွင် လက်ထောက်ညွှန်ကြားရေးမှူးအဖြစ် အေအာဒီစီ (မြေယာ ကျေးလက်ကြီးပွား တိုးတက်ရေး ကော်ပိုရေးရှင်း) ထံမှ သစ်တောဌာနက လွှဲပြောင်းလက်ခံရန် သွားရာမှအစပြု၍ ပုပ္ပားတောင်နှင့် ထိတွေ့ခဲ့သည်။ ၁၉၈၁ ခုနှစ်တွင် National Park and Nature Conservation (NPNC) အမည်ရှိ UNDP စီမံချက်အရ ပုပ္ပား အပါအဝင် အလောင်းတော် ကဿပ၊ ချပ်သင်း၊ ရွှေစက်တော်၊ လှော်ကား စသည့် ဒေသများကို သဘာဝ တောနှင့် ဥယျာဉ်များ တည်ဆောက်ရေးလုပ်ငန်း စတင်ခဲ့သည်။ ယင်းစီမံကိန်းအရ ပုပ္ပားဒေသ ထိန်းသိမ်းရေးနှင့် သဘာဝဥယျာဉ် တည်ဆောက်ရေးတာဝန်ကို ဦးအုန်းက သစ်တောဌာန ညွှန်ကြားရေးမှူးအဖြစ် ၁၉၈၁ မှ ၁၉၈၅ ခုနှစ်အထိ တာဝန်ယူခဲ့ရသည်။ ပုပ္ပားတောင် စိမ်းလန်းစိုပြည်စ ပြုလာသည့်အချိန်တွင် နိုင်ငံခြားမှ ရောက်လာသည့် Chief Technical Advisor (NPNC နည်းပညာ အကြံပေးခေါင်းဆောင်) Mr.John Blower က ပုပ္ပါးတောင်မကြီးကို ပတ်၍ ကားလမ်းဖောက်ရန် အကြံပြုရာ လက်ခံလိုသူ အများအပြားရှိသော်လည်း ဦးအုန်းက သုံးလေးနှစ် အတွင်း တောင်ကတုံး ပြန်ဖြစ်သွားနိုင်ကြောင်း ရှင်းပြကန့်ကွက်ခဲ့သည်။ ရာထူးနေရာ ထိခိုက်မည်ကို မကြောက်ဘဲ ထိုသို့ ကန့်ကွက်ခဲ့သည့်အတွက် တောင်ပတ်ကားလမ်း စီမံကိန်း အကောင်အထည်မဖော်ဖြစ်တော့ဘဲ ပုပ္ပားတောင် စိမ်းလန်းစိုပြည်မှုကို ထိန်းသိမ်းနိုင်ခဲ့သည်။

ဦးအုန်းသည် ၁၉၈၈ မှ ၁၉၉၃ အထိ သစ်တောဦးစီးဌာနတွင် အကြံပေးပုဂ္ဂိုလ်အဖြစ် တာဝန်ထမ်းဆောင်ခဲ့သည်။ ၁၉၉၂ ခုနှစ်တွင် ပြဋ္ဌာန်းခဲ့သော သစ်တောဥပဒေ မူကြမ်း ရေးဆွဲခြင်းနှင့် ၁၉၉၄ ခုနှစ်တွင် ပြဋ္ဌာန်းခဲ့သည့် တောရိုင်းတိရစ္ဆာန်၊ သဘာဝအပင်များ ကာကွယ်ရေးနှင့် သဘာဝနယ်မြေများ ထိန်းသိမ်းရေးဥပဒေ ရေးဆွဲရာတွင် ကော်မတီအဖွဲ့ဝင်အဖြစ် ပါဝင်ဆောင်ရွက်ခဲ့သည်။

အမေရိကန်ပြည်ထောင်စု၊ ဥရောပ၊ အိန္ဒိယ၊ သြစတြေးလျ၊ နယူးဇီလန်၊ ထိုင်း၊ စင်ကာပူ နိုင်ငံများသို့ ၈ ကြိမ် သွားရောက်ပြီး သစ်တောသုတေသန၊ ကွန်ပျူတာ၊ သဘာဝ ထိန်းသိမ်းရေးနှင့် အမျိုးသားဥယျာဉ် အုပ်ချုပ်ရေး ပညာရပ်တို့ကို လေ့လာဆည်းပူးခဲ့သည်။ နိုင်ငံရပ်ခြားသို့ ဆွေးနွေးပွဲများ၊ စာတမ်းဖတ်ပွဲများအတွက် အကြိမ်ကြိမ် သွားရောက်ခဲ့သည်။ International Union for Conservation Natural Recources (IUCN) ၏ အသင်းဝင်အဖြစ် ၁၉၈၆ မှ ယနေ့တိုင် ဆောင်ရွက်နေဆဲ ဖြစ်တယ်။ International Society for Mangrove Ecosystem (ISME) ၏ ရာသက်ပန်အသင်းသား ဖြစ်ပြီး သစ်တော သယံဇာတ ပတ်ဝန်းကျင် ဖွံ့ဖြိုးတိုးတက်ရေးနှင့် ထိန်းသိမ်းရေးအသင်း (FREDA) တွင် ဒုဥက္ကဋ္ဌ အဖြစ် တာဝန်ယူထားသည်။

သုတေသနစာစောင် ၁၅ စောင် ပြုစုခဲ့ပြီး သစ်တောပညာရပ်ဆိုင်ရာ စာအုပ် တစ်အုပ် ရေးသားခဲ့သည်။ ထိုစာအုပ်ဖြင့် စာပေဗိမာန် စာမူဆု ရရှိခဲ့သည်။

၁၉၈၂ ခုနှစ်မှ ၁၉၈၆ ခုနှစ် အတွင်း ပုပ္ပားတောင် စိမ်းလန်းစိုပြည်ရေး အတွက် သစ်တောများ စိုက်ပျိုးနိုင်ခဲ့သည့်အတွက် ပုပ္ပားတောင်ဒေသ တောင်ကတုံး ဖြစ်စေမယ့် အခြေအနေမှ ရှောင်လွှဲနိုင်ခဲ့သည်။ ၁၉၉၇ ခုနှစ်မှ ၂၀၀၇ ခုနှစ် အတွင်း ဧရာဝတီ မြစ်ဝကျွန်းပေါ်ဒေသ (ပျဉ်ဒရယ် သစ်တောကြိုးဝိုင်း)တွင် ဒီရေတောများကို ဧက ၂၅၀၀ ပြန်လည်စိုက်ပျိုးနိုင်ခဲ့သည့်အတွက် ဂေဟစနစ်နဲ့ ဇီဝ မျိုးကွဲများကို မူလအတိုင်း ပြန်လည်ထိန်းသိမ်းနိုင်ခဲ့သည်။ ယင်းလုပ်ဆောင်ချက်များသည် ဦးအုန်း၏ သဘာဝပတ်ဝန်းကျင် ထိန်းသိမ်းရေးသမားဘဝ သက်တမ်းတလျှောက် ကျေနပ်မှုအရှိဆုံး လုပ်ဆောင်ချက်များဖြစ်သည်။

အဆိုပါ လုပ်ဆောင်ချက်များကြောင့် ဦးအုန်းကို ၂၀၀၇ ခုနှစ်အတွက် Weekly Eleven News ဂျာနယ်၏ ထင်ရှားကျော်ကြားကဏ္ဍတွင် ထည့်သွင်းဖော်ပြ ဂုဏ်ပြုခဲ့ပြီး ၂၀၀၅ ခုနှစ် ဂျပန်နိုင်ငံတွင် ပြုလုပ်သည့် World Exposition ပွဲ၌ ဂျပန်နိုင်ငံ Citizen Forum ပညာရှင်များအသင်းက ကမ္ဘာအချစ်ဆုံး လူပုဂ္ဂိုလ် ၁၀၀ စာရင်းတွင် ဦးအုန်းကို ရွေးချယ်ဂုဏ်ပြုခဲ့သည်။

ဦးအုန်းသည် ၂၀၀၇ ခုနှစ်တွင် ဂျပန်နိုင်ငံက ချီးမြၟင့်သော Minamata Environmental Award ဆုကို ထပ်မံ ရရှိခဲ့ပြီး ဆုငွေ ဂျပန်ယန်း တစ်သန်း လက်ခံရရှိခဲ့သည်။ ထိုငွေဖြင့် သဘာဝပတ်ဝန်းကျင် ထိန်းသိမ်းရေးလှုပ်ရှားမှုများကို ထောက်ပံ့နိုင်ရန် ကိုယ်ပိုင်ရန်ပုံငွေ ထူထောင်ကာ ရန်ပုံငွေထဲမှ သဘာဝ ပတ်ဝန်းကျင်ဆိုင်ရာဆုအဖြစ် ဦးအုန်း အပါအဝင် ဘုတ်အဖွဲ့ဝင် ငါးဦးက ၁ နှစ် တစ်ယောက် ရွေးချယ်ချီးမြှင့်သွားမည်ဟု သိရသည်။

‘ကမ္ဘာမြေ ချစ်သူဆု’ကို ၂ဝ၁၂ ခုနှစ် ဧပြီလ ၂၂ ရက် ‘မြေကမ္ဘာနေ့’တွင် ချီးမြှင့်သွားမည်ဖြစ်ကြောင်း FREDA အသင်းမှ သိရသည်။ အဆိုပါ ‘ကမ္ဘာမြေ ချစ်သူဆု’ သည် မိမိ၏ ချွေးနှဲစာ၊ ကိုယ်ပိုင်ငွေကြေးဖြင့် အနည်းဆုံး သစ်ပင် ၁ဝဝဝ ရှင်သန်အောင် စိုက်ပျိုးနိုင်သူကို သစ်တောပညာရှင် ဦးအုန်းက ဂုဏ်ပြုချီးမြှင့်မည့်ဆု ဖြစ်ပြီး ကမ္ဘာမြေ ချစ်သူဆု အတွက် ၁ဝ ဦးအပြင် အခြား သဘာဝပတ်ဝန်းကျင်နှင့် ပတ်သက်သောကိစ္စရပ်များတွင် ပါဝင်ဆောင်ရွက်ကြသည့် လူပုဂ္ဂိုလ် ၅ ဦးကိုလည်း အထူးဆုများ ချီးမြှင့်သွားမည်ဟု သိရသည်။

ဦးအုန်းသည် ၂၀၀၉ မှ ယနေ့အထိ ပြည်တွင်း ပတ်ဝန်းကျင်ထိန်းသိမ်းရေးဆိုင်ရာ NGO ၁၇ ခု ပေါင်းစပ်ဖွဲ့စည်းထားသော MERN (Mangrove Environmental Rehabilitation Network) အဖွဲ့ ဥက္ကဋ္ဌ အဖြစ် ဆောင်ရွက်လျက်ရှိပြီး ဧရာဝတီမြစ်ဆုံစီမံကိန်း၊ အင်းလေးကန် သဘာဝပတ်ဝန်းကျင် ထိန်းသိမ်းရေး အစရှိသည့်ကိစ္စရပ်များတွင် ပညာရှင်တစ်ဦးအနေဖြင့် သဘာဝပတ်ဝန်းကျင် ထိန်းသိမ်းရေးအတွက် ဦးတည်ဆောင်ရွက်လျက်ရှိသည်။

ဦးအုန်းသည် လူတို့ သဘာဝနှင့် သဟဇာတဖြစ်စွာ နေထိုင်အသက်ရှင်ရန် လိုအပ်ချက်များအကြောင်း ဖော်ပြပါဝင်သည့် “Surviving Together” အမည်ရ စာအုပ်တစ်အုပ် ရေးရန် စီစဉ်လျက်ရှိပြီး အမှတ် ၃၅ (ဃ)၊ ကျိုက်ဝိုင်း ဘုရားလမ်း၊ မရမ်းကုန်းမြို့နယ် ရန်ကုန်မြို့၌ နေထိုင်လျက်ရှိသည်။     ။

Last modified on Sunday, 22 April 2012 14:40
You are here: Home ဂုဏ်ယူဖွယ်ရာမြန်မာများ Honorable Citizens လက်ရှိ ဆောင်ရွက်နေသူများ current activists မြန်မာ့သစ်တောပညာရှင် ဦးအုန်း