Friday, 16 March 2012 07:19

ရန်ကုန် ဗဟန်းမြို့နယ်ရှိ ဇီဝိတဒါန သံဃာ့ဆေးရုံကြီး

အမှတ် ၃၈၊ ကိုယ့်မင်းကိုယ့်ချင်းလမ်း၊ ဗဟန်းမြို့နယ်၊ ရန်ကုန်တွင် တည်ရှိသော ‘ဇီဝိတဒါန သံဃာ့ဆေးရုံကြီး’ကို ဗြိတိသျှကိုလိုနီလက်ထက် ၁၉၄၀ ပြည့်နှစ် မေလ ၈ ရက်နေ့တွင် ဆေးပေးခန်းကလေးမှ စတင်ခဲ့ခြင်းဖြစ်သည်။ ယင်းကာလတွင် လူမျိုး ဘာသာအလိုက် အနောက်နိုင်ငံဆေးဝါးဖြင့် ကုသပေးသော ဟိန္ဒူ ရာမာခရစ်ရှာနာ ကုသိုလ်ဖြစ်ဆေးရုံ၊ မူဆလင်ကုသိုလ်ဖြစ် ဆေးခန်း၊ ခရစ်ယာန်သာသနာပြု ဆေးရုံ စသည့်တို့ ရှိနေခဲ့ရာ အမျိုးသားရေးစိတ်ဓာတ် လူမှုရေးစိတ်ဓာတ်ရှိပြီး၊ အမြော်အမြင်ကြီးမားသူ အငြိမ်းစားအရေးပိုင် ဦးဘအေးက ၎င်းနှင့် စိတ်တူ သဘောတူ ပုဂ္ဂိုလ်များနှင့် တိုင်ပင်ညှိနှိုင်းကာ ဗဟန်းကြားတောရလမ်းရှိ ၎င်းပိုင် ဇရပ် အမှတ် ၇၃ တွင် အနောက်တိုင်းဆေးဝါးဖြင့် ကုသပေးသည့် ဇီဝိတဒါနဆေးခန်းကို စတင်ဖွင့်လှစ်ခဲ့သည်။

ဆေးပေးခန်းတည်ထောင်သူတို့၏ မူလရည်ရွယ်ချက်မှာ “လူမျိုး မရွေး၊ ဘာသာ မရွေး၊ ဆင်းရဲချမ်းသာ အဆင့်အတန်းမရွေး၊ ကျားမ မရွေး၊ လာလာသမျှ မကျန်းမာသူ ဂိလာန ပုဂ္ဂိုလ်ဟူသမျှကို အခမဲ့စမ်းသပ် ဆေးဝါးကုသ ပေးကမ်းလှူဒါန်းရန်” ဖြစ်သည်။ ဆေးခန်း စတင်ဖွင့်လှစ်စဉ်က ပြည်သူများ၏ အလှူငွေများနှင့် ဆေးပညာရှင်များ၊ စေတနာရှင်ပုဂ္ဂိုလ်များ၏ လုပ်အားဒါနအပေါ် အခြေပြုခဲ့ရာ ရည်ရွယ်ချက်ကောင်းမွန်ခြင်း၊ စေတနာကောင်းမွန်ခြင်း၊ ပြည်သူများ၏အားပေးမှုကြောင့် ဒုတိယကမ္ဘာစစ်အတွင်း ဂျပန်ခေတ်ကာလတွင်လည်း တည်တံ့ခဲ့သည်။

၁၉၄၈ ခုနှစ်တွင် မူလဦးဆောင်သူ ဦးဘအေး ကွယ်လွန်ခဲ့ရာ နောင်တွင် မြန်မာနိုင်ငံ လွတ်လပ်ရေးရရှိပြီးနောက် သမ္မတဖြစ်လာသူ တရားလွှတ်တော်တရားဝန်ကြီး ဒေါက်တာဘဦး က ဇီဝိတဒါန ဆေးခန်းကို ဆက်လက်ဦးဆောင်ခဲ့ပြီး ၁၉၅၂ ခုနှစ်တွင် လက်ရှိနေရာကို အလှူငွေဖြင့် ၀ယ်ယူခဲ့သည်။ မြေကွက်နှင့်အတူပါလာသော အိမ်ဟောင်းကြီးပေါ်တွင် ခုတင် ၁၀ လုံးဖြင့် ဆေးရုံငယ်အဖြစ် စတင်ခဲ့သည်။ ဆေးရုံအဆောက်အအုံ ဖြစ်ပေါ်လာစေရန် ကြိုးပမ်းဆောင်ရွက်ခဲ့ရာ ၆.၁၂.၁၉၅၂ ရက်နေ့တွင် ဆေးရုံသစ်ကြီးအဖြစ် ဖွင့်လှစ်နိုင်ခဲ့သည်။

ဇီဝိတဒါနဆေးရုံ ဖြစ်လာပြီးနောက် လုပ်ငန်းဆောင်ရွက်မှုရှင်သန်ရေးမှာ အလှူငွေပေါ်တွင်သာ အားထားရပါသည်။ ၁၉၆၃ ခုနှစ်တွင် တော်လှန်ရေးကောင်စီအစိုးရ ကျန်းမာရေးဝန်ကြီးဌာနက ဆေးရုံကြီးသို့ လာရောက်ကြည့်ရှုပြီး ၁ နှစ်လျှင် ငွေကျပ် ၇၀၀၀၀ ထောက်ပံ့ခဲ့သည်။ ၁၉၆၉ ခုနှစ်တွင် ထောက်ပံ့ငွေ ရပ်ဆိုင်းသွားသဖြင့် ငွေကြေးအခက်အခဲနှင့် ကြုံခဲ့ရပြန်သည်။ ၁၉၇၂ ခုနှစ်တွင် ဆေးရုံ အုပ်ချုပ်ရေးအဖွဲ့အနေဖြင့် ကျောင်းထိုင်ဆရာတော်ကြီးများအဖွဲ့၏ သြ၀ါဒကိုခံယူရာ၊ ဇီဝိတဒါနဆေးရုံကို အလှူငွေပိုမို ရရှိစေရန်အတွက် ဇီဝိတဒါန သံဃာ့ဆေးရုံအဖြစ် အမည်ပြောင်းရန်အကြံပြုသဖြင့် ၁၉၇၂ ခုနှစ် မတ်လ ၃၀ ရက်နေ့တွင် ဇီဝိတဒါနသံဃာ့ဆေးရုံ ဟု အမည်ပြောင်းလဲခဲ့သည်။

ဤသို့ဖြင့် အလှူငွေများ ပိုမိုရရှိလာပြီး အဆောက်အအုံသစ်များလည်း တိုးတက်ဆောက်လုပ်ခဲ့ရာ ခုတင် ၁၀၀ ဆံ့ ဆေးရုံကြီးအဆင့်သို့ ရောက်ရှိလာခဲ့သည်။ ၁၉၈၆ ခုနှစ်တွင် သီလရှင်ဆေးရုံ တည်ဆောက်ရေးနှင့်ပတ်သက်၍ သံဃမဟာနာယကအဖွဲ့မှ သြ၀ါဒစရိယ ဆရာတော်ကြီးများကို ပင့်ဖိတ်၍ သြ၀ါဒခံယူခဲ့ရာ ဥက္ကဋ္ဌဆရာတော် ပဲခူးမြို့မဆရာတော်ကြီး အမှူးပြုသော ဆရာတော် ၁၀ ပါး ကြွရောက်ခဲ့ပြီး ၀ိနည်းတော်နှင့်အညီ သံဃာ့ဆေးရုံနှင့် အလှမ်းကွာဝေးသည့်နေရာတွင် သီလရှင်ဆေးရုံဆောက်လုပ်ရန် သြ၀ါဒ ပေးခဲ့၍ ၁၉၈၇ ခုနှစ် မတ်လတွင် ပန္နက်ရိုက်မင်္ဂလာကျင်းပပြီး ၁၉၈၈ ခုနှစ်တွင် ၃ ထပ် အဆောက်အအုံကိုလည်းကောင်း၊ ၁၉၉၄ ခုနှစ်တွင် ၄ ထပ် အဆောက်အအုံကိုလည်းကောင်း ဖွင့်လှစ်နိုင်ခဲ့သည်။

ယနေ့ဇီဝိတဒါသံဃာ့ဆေးရုံကြီးတွင် သံဃာတော်အပါး ၁၀၀ နှင့် သီလရှင်အပါး ၅၀ ကို အတွင်းလူနာအဖြစ် လက်ခံကုသပေးနိုင်ငံသည့်အပြင် သံဃာတော်၊ သီလရှင်၊ လူပုဂ္ဂိုလ်များအတွက်၊ ပြင်ပ လူနာဌာန ၃ ခု၊ သံဃာ/အမျိုးသား၊ သီလရှင်/အမျိုးသမီးတို့ အတွက် ခွဲစိတ်ခန်းကြီး ၂ ခု၊ မျက်စိ ခွဲစိတ်ခန်းကြီး ၁ ခုနှင့် နား/နှာခေါင်း၊ လည်ချောင်းအတွက် ခွဲစိတ်ခန်းငယ် ၁ ခု ဖွင့်လှစ်ထားရှိပါသည်။

ဆေးရုံတွင် ၀န်ထမ်းဆရာဝန်များအပြင် လုပ်အားပေးနေသော စေတနာဆရာဝန်ကြီးများ ၁၀၀ ကျော်ရှိသည်။ ပါမောက္ခများ၊ အငြိမ်းစားပါမောက္ခများ၊ တပ်မတော်ဆေးရုံမှ အငြိမ်းစား ဆရာဝန်ကြီးများပါရှိရာ ယင်းတို့အနက် ၉၀ ရာခိုင်နှုန်းမှာ အထူးကုဆရာဝန်ကြီးများဖြစ်ကြ၍ အထူးကု ၁၈ မျိုးကို သံဃာတော်/ သီလရှင်များအား ကုသိုလ်ဖြစ် ကုသပေးလျက်ရှိရာ ခွဲစိတ်ကုသ လူနာများ၊ မျက်စိ၊ နား၊ နှာခေါင်း၊ လည်ချောင်း၊ သွား၊ အရိုးအကြောအဆစ်၊ ဆီးလမ်းကြောင်း၊ အူလမ်းကြောင်း၊ နှလုံးရောဂါ စသည့် အထူးကုလူနာများကိုပါ လက်ခံကုသပေးနေရသော ဆေးရုံကြီးအဖြစ် ရောက်ရှိနေပြီဖြစ်သည်။

လူပုဂ္ဂိုလ်များအတွက်လည်း ပြင်ပလူနာဌာန ဖွင့်လှစ်ပေးခဲ့ပြီး ရုံးဖွင့်ရက်များတွင် နံနက် ၈ နာရီမှ ညနေ ၄ နာရီအထိ ဆရာဝန် ၄ ဦးက  ဆင်းရဲချမ်းသာမရွေး၊ ဘာသာမရွေး၊ ကျား/မ မရွေး အခမဲ့စမ်းသပ်၍ သာမန်ရောဂါများအတွက် ဆေးကို ရောဂါပျောက်ကင်းသည်အထိ အခမဲ့ပေးလှူလျက်ရှိသည်။ အထူးကုဆရာဝန်ကြီးများနှင့် ကုသခြင်းအတွက် ငွေပေးရန်မလိုဘဲ အထူးကုဆရာဝန်ကြီးများ ညွှန်းသည့်ဆေးကိုမူ မိမိဘာသာ ၀ယ်ယူရပါသည်။

အထူးကုဆရာဝန်ကြီးများ၏ ဆုံးဖြတ်ချက်အရ ခွဲစိတ်ကုသရန် လိုအပ်သောလူနာများအနေဖြင့် ခွဲစိတ်ဆရာဝန်ကြီးသို့ ခွဲစိတ်ခပေးရန် မလိုအပ်ပါ။ ခွဲစိတ်ခန်း အသုံးပြုခြင်းအတွက်လည်းကောင်း၊ လက်ထောက်ဆရာဝန်၊ သူနာပြုများအတွက်လည်းကောင်း ငွေကြေးပေးရန်မလိုဘဲ သတ်မှတ်ထားသော သာမန်ခွဲစိတ်ခကို ပေးလှူကြရပါသည်။

ဇီဝိတဒါန သံဃာ့ဆေးရုံကြီးနှင့် ပတ်သက်၍ ပိုမိုသိရှိလိုပါက  www.jivitahospital.org  တွင် ကြည့်ရှုနိုင်ပြီး ဆက်သွယ်လိုပါက ဆေးရုံကြီးတည်ရှိရာ အမှတ် ၃၈၊ ကိုယ့်မင်းကိုယ့်ချင်းလမ်း၊ ဗဟန်းမြို့နယ်၊ ရန်ကုန်မြို့ ဖုန်းနံပါတ် ၅၅၇၇၃၃၊ ၅၄၁၇၉၅၊ ၅၄၅၇၈၂၊ အီးမေးလ်  This e-mail address is being protected from spambots. You need JavaScript enabled to view it. တို့သို့ ဆက်သွယ်နိုင်ပါသည်။     ။

Last modified on Friday, 16 March 2012 22:58
You are here: Home ဂုဏ်ယူဖွယ်ရာမြန်မာများ Honorable Citizens လက်ရှိ ဆောင်ရွက်နေသူများ current activists ရန်ကုန် ဗဟန်းမြို့နယ်ရှိ ဇီဝိတဒါန သံဃာ့ဆေးရုံကြီး